آسٹریلوی آرمی چیف کی پاکستانی ہم منصب سے ملاقات، دفاع اور سیکیورٹی تعاون بڑھانے پر اتفاق

راولپنڈی: آسٹریلوی آرمی چیف لیفٹیننٹ جنرل سائمن اسٹیورٹ نے آج جی ایچ کیو میں پاکستان کے چیف آف آرمی اسٹاف جنرل سید عاصم منیر سے ملاقات کی جس میں دونوں ممالک نے دفاع اور سیکیورٹی کے شعبے میں تعاون کو مزید مضبوط کرنے پر اتفاق کیا۔

آئی ایس پی آر کے مطابق، ملاقات میں دونوں رہنماؤں نے باہمی دلچسپی کے امور پر گفتگو کی اور عالمی و علاقائی سیکیورٹی کی صورتحال پر تبادلہ خیال کیا۔ آرمی چیف جنرل عاصم منیر نے آسٹریلیا کے ساتھ پاکستان کے تعلقات کی اہمیت کو اجاگر کیا اور امن و استحکام کے مشترکہ اہداف کے لیے مضبوط دو طرفہ روابط کو سراہا۔

دونوں ممالک نے اس بات پر زور دیا کہ دفاع اور سیکیورٹی میں تعاون کو مزید وسعت دی جائے اور عالمی و علاقائی امن کے لئے مستقل تعاون کی اہمیت کو تسلیم کیا گیا۔ آسٹریلوی آرمی چیف نے دہشت گردی کے خاتمے کے لئے پاکستان کی کاوشوں کی تعریف کی اور دونوں ملکوں کے درمیان دفاعی تعاون کو مزید گہرا کرنے کے عزم کا اظہار کیا۔

قبل ازیں، جی ایچ کیو پہنچنے پر لیفٹیننٹ جنرل اسٹیورٹ نے یادگار شہداء پر پھولوں کی چادر چڑھائی اور پاکستان کے شہداء کو خراج عقیدت پیش کیا۔ اس موقع پر پاک فوج کے چاق و چوبند دستے نے انہیں گارڈ آف آنر بھی پیش کیا۔