ای سی سی کی منظوری: سردیوں کے لیے بجلی کے فی یونٹ پر ریلیف

کابینہ کی اقتصادی رابطہ کمیٹی (ای سی سی) نے موسم سرما میں بجلی صارفین کے لیے خصوصی ریلیف پیکج کی منظوری دے دی، جس کے تحت بجلی کے فی یونٹ پر 26 روپے تک رعایت دی جائے گی۔

وزیر خزانہ محمد اورنگزیب کی زیر صدارت اجلاس میں پاور ڈویژن کی جانب سے پیش کی گئی سمری منظور کر لی گئی۔ اعلامیے کے مطابق یہ پیکج کے الیکٹرک سمیت ملک بھر کے گھریلو، کمرشل، اور صنعتی صارفین پر لاگو ہوگا، اور اس کا اطلاق دسمبر 2024 سے فروری 2025 تک ہوگا۔

اعلامیے میں بتایا گیا کہ گزشتہ سال کے مقابلے میں اضافی بجلی کے استعمال پر فلیٹ ریٹ کی صورت میں رعایت دی جائے گی۔ گھریلو صارفین کو 11.42 روپے سے 26 روپے فی یونٹ، کمرشل صارفین کو 13.46 روپے سے 22.71 روپے فی یونٹ، جبکہ صنعتی صارفین کو 5.72 روپے سے 15.05 روپے فی یونٹ تک ریلیف ملے گا۔

ونٹر پیکج کے تحت:

گھریلو صارفین کو 30 فیصد اضافی استعمال پر کم از کم 11.42 روپے اور 50 فیصد اضافی استعمال پر 26 روپے فی یونٹ کی بچت ہوگی۔

کمرشل صارفین کو 34 فیصد اضافی استعمال پر کم از کم 13.46 روپے اور 47 فیصد اضافی استعمال پر 22.71 روپے فی یونٹ کا ریلیف دیا جائے گا۔

صنعتی صارفین کو 18 فیصد اضافی استعمال پر 5.72 روپے اور 37 فیصد اضافی استعمال پر 15.05 روپے فی یونٹ تک رعایت دی جائے گی۔

یہ فیصلہ حکومت کی جانب سے توانائی کے شعبے میں عوام کو سہولت فراہم کرنے اور اضافی بجلی کے استعمال کی حوصلہ افزائی کے لیے کیا گیا ہے۔