ملک بھر میں 446 یوٹیلیٹی اسٹورز بند، مزید 500 کی بندش کا امکان

وفاقی حکومت کی جانب سے یوٹیلیٹی اسٹورز پر دی جانے والی سبسڈی ختم ہونے کے بعد اخراجات میں کمی کے لیے ملک بھر میں 446 یوٹیلیٹی اسٹورز بند کر دیے گئے ہیں۔

یوٹیلیٹی اسٹورز کارپوریشن کے ذرائع کے مطابق مزید 500 سے زائد اسٹورز کی بندش پر بھی غور کیا جا رہا ہے۔ تاہم، حکام نے یقین دہانی کرائی ہے کہ اسٹورز کی بندش کے باوجود کسی ملازم کو برطرف نہیں کیا جائے گا۔

ذرائع نے بتایا کہ صرف وہی اسٹورز بند کیے جا رہے ہیں جو مسلسل خسارے میں جا رہے تھے، جبکہ دیہی علاقوں میں موجود زیادہ تر یوٹیلیٹی اسٹورز بندش کا شکار ہوئے ہیں۔

یہ بات قابل ذکر ہے کہ ملک بھر میں یوٹیلیٹی اسٹورز کی مجموعی تعداد 3 ہزار 982 ہے۔