سیکیورٹی فورسز نے خیبرپختونخوا اور بلوچستان کے مختلف اضلاع میں جاری آپریشنز کے دوران گزشتہ پانچ دنوں میں 43 خارجی دہشت گردوں کو ہلاک کر دیا۔
پاک فوج کے شعبہ تعلقات عامہ (آئی ایس پی آر) کے مطابق، 12 اور 13 دسمبر کی درمیانی شب ضلع لکی مروت میں خفیہ اطلاع پر کارروائی کے دوران 6 دہشت گرد مارے گئے۔
آئی ایس پی آر نے مزید بتایا کہ 9 دسمبر 2024 سے اب تک خیبرپختونخوا میں 18 دہشت گرد ہلاک کیے جا چکے ہیں۔
بلوچستان میں، 13 دسمبر کو موسیٰ خیل اور پنجگور اضلاع میں خفیہ اطلاع پر کیے گئے آپریشنز کے دوران شدید فائرنگ کے تبادلے میں 10 دہشت گردوں کو ہلاک کیا گیا۔ مجموعی طور پر 9 دسمبر سے بلوچستان میں 25 دہشت گرد مارے جا چکے ہیں۔
آئی ایس پی آر نے کہا کہ یہ کارروائیاں اس وقت تک جاری رہیں گی جب تک ان علاقوں میں مکمل امن بحال نہیں ہو جاتا اور خارجی دہشت گردوں کا خاتمہ نہیں کیا جاتا۔
پاک فوج کے ترجمان نے مزید کہا کہ پاکستان کی سیکیورٹی فورسز ملک سے دہشت گردی کی لعنت کو جڑ سے ختم کرنے کے لیے پرعزم ہیں۔ ان آپریشنز سے خیبرپختونخوا میں موجود خوارج اور بلوچستان میں سرگرم دہشت گرد گروہوں کو شدید دھچکا لگا ہے۔
یہ آپریشنز ایسے وقت میں کیے جا رہے ہیں جب پاکستان دہشت گردی کی بڑھتی ہوئی لہر کا سامنا کر رہا ہے۔ اسلام آباد کے تھنک ٹینک، پاک انسٹی ٹیوٹ فار پیس اسٹڈیز (پِپس) نے اپنی تازہ رپورٹ میں انکشاف کیا کہ نومبر 2024 میں پاکستان میں 61 دہشت گرد حملے ہوئے، جو گزشتہ ماہ کے مقابلے میں 27 فیصد زیادہ ہیں۔ ان حملوں میں 169 افراد ہلاک اور 225 زخمی ہوئے، جو اکتوبر کے مقابلے میں 69 فیصد زیادہ ہیں۔