حکومت اور پاکستان تحریک انصاف (پی ٹی آئی) کے درمیان مذاکرات کا آغاز ہو گیا ہے۔
اسپیکر قومی اسمبلی ایاز صادق سے پی ٹی آئی کے رہنماؤں نے اسپیکر ہاؤس میں ملاقات کی، جس میں بیرسٹر گوہر، عمر ایوب، صاحبزادہ حامد رضا اور وزیر قانون اعظم نذیر تارڑ شریک تھے۔ قبل ازیں سلمان اکرم راجہ اور اسد قیصر نے بھی اسپیکر سے ملاقات کی۔
ذرائع کے مطابق، مذاکرات کے لیے پارلیمنٹ کو فورم کے طور پر استعمال کرنے کا فیصلہ کیا گیا۔ یہ تجویز اسپیکر ایاز صادق نے پیش کی تھی، جسے دونوں فریقین نے تسلیم کر لیا۔
مذاکرات بغیر کسی پیشگی شرائط کے ہوں گے، اور ان کا مقصد ملک میں سیاسی تناؤ اور عدم استحکام کو ختم کرنا ہے۔ جلد ہی دونوں جانب سے مذاکراتی کمیٹیوں کے ارکان کے نام مشاورت سے پیش کیے جائیں گے۔
حکومتی ذرائع کے مطابق، پی ٹی آئی نے حکومت کے ساتھ مذاکرات کے لیے پہل کی اور مفاہمت کے لیے پیش قدمی کی۔ حکومت نے اس پیشکش کو تسلیم کرتے ہوئے کہا کہ سیاست میں آگے بڑھنے کا راستہ مذاکرات ہیں، انتشار نہیں۔
ذرائع کے مطابق، پی ٹی آئی اپنے ابتدائی مطالبات سے پیچھے ہٹ گئی ہے۔ تاہم، وہ 9 مئی اور 26 نومبر کے واقعات پر جوڈیشل کمیشن چاہتی ہے۔