ابوظہبی کے ولی عہد شہزادہ شیخ خالد بن محمد بن زید النہیان اپنے پہلے سرکاری دورے پر اسلام آباد پہنچ گئے، جہاں صدر مملکت آصف علی زرداری اور وزیر اعظم محمد شہباز شریف نے نور خان ایئربیس پر ان کا پرتپاک استقبال کیا۔ اس موقع پر دونوں رہنماؤں نے معزز مہمان سے گرمجوشی سے مصافحہ کیا اور خیرسگالی کے جذبات کا تبادلہ کیا۔ دو بچوں نے روایتی انداز میں ولی عہد کو گلدستے پیش کیے، جبکہ نائب وزیر اعظم و وزیر خارجہ اسحاق ڈار اور خاتون اول آصفہ بھٹو زرداری بھی اس موقع پر موجود تھیں۔
ابوظہبی کے ولی عہد کے ہمراہ وزرا، اعلیٰ حکام اور کاروباری شخصیات پر مشتمل ایک اعلیٰ سطحی وفد بھی پاکستان آیا ہے۔ ان کے استقبال کے لیے اسلام آباد کو خوبصورتی سے سجایا گیا، جبکہ خیرمقدمی بینرز اور پاکستان و متحدہ عرب امارات کے پرچم شاہراہوں پر آویزاں کیے گئے۔
یہ دورہ پاکستان اور متحدہ عرب امارات کے گہرے برادرانہ تعلقات اور اقتصادی شراکت داری کے فروغ کے مشترکہ عزم کی عکاسی کرتا ہے۔ ولی عہد اپنے قیام کے دوران پاکستانی قیادت سے ملاقاتیں کریں گے، جن میں باہمی دلچسپی کے امور، تاریخی روابط کے استحکام اور سرمایہ کاری و اقتصادی تعاون کو فروغ دینے پر تبادلہ خیال ہوگا۔ اس دوران مختلف شعبوں میں طویل المدتی تعاون کے لیے کئی معاہدے اور مفاہمتی یادداشتوں پر دستخط کیے جانے کا بھی امکان ہے۔