لاہور کے علاقے ہربنس پورہ کی شالیمار ہاؤس اسکیم میں ایک شہری کے ڈیرے سے شیر فرار ہو گیا، جسے سیکیورٹی گارڈ نے گولی مار کر ہلاک کر دیا۔
شیر کے باہر نکلنے سے علاقے میں خوف و ہراس پھیل گیا، اور شہریوں نے پولیس کو فوری طور پر اطلاع دی۔ مقامی ذرائع کے مطابق، علی عدنان نامی شخص نے اپنے ڈیرے پر شیر رکھا ہوا تھا، جو اچانک باہر نکل آیا۔ دھاڑتا ہوا شیر سڑکوں پر دوڑتا رہا، جس سے عوام میں خوف کی لہر دوڑ گئی۔
سیکیورٹی گارڈز نے فوری ایکشن لیتے ہوئے شیر کو مزید نقصان پہنچانے سے روکنے کے لیے گولیاں مار کر ہلاک کر دیا۔ واقعے کے بعد محکمہ وائلڈ لائف اور پولیس موقع پر پہنچ گئیں۔
پولیس نے کارروائی کرتے ہوئے شیر کو ہلاک کرنے والے سیکیورٹی گارڈ، شہباز، کو گرفتار کر لیا۔ محکمہ وائلڈ لائف کے انسپکٹر کی مدعیت میں گارڈ کے خلاف مقدمہ درج کیا گیا۔ حکام نے گارڈ کو قانونی کارروائی کے لیے تفتیشی ٹیم کے حوالے کر دیا۔