محکمہ موسمیات نے اہم موسمیاتی پیشگوئی جاری کر دی۔

ملک کے مختلف حصوں میں 4 جنوری تک بارش اور برفباری کے امکانات ہیں۔

محکمہ موسمیات کے مطابق، ایک نیا مغربی ہوائی نظام آج پاکستان میں داخل ہونے کا امکان ہے، جو ملک میں سردی کی شدت میں اضافے کا باعث بنے گا۔

آج کے روز شمالی اور مغربی بلوچستان، بالائی خیبرپختونخوا، گلگت بلتستان، کشمیر، اور قریبی پہاڑی علاقوں میں بارش اور برفباری متوقع ہے۔ اسلام آباد اور اس کے گردونواح میں موسم سرد اور جزوی طور پر ابرآلود رہنے کے ساتھ ساتھ ہلکی بارش یا بونداباندی کا امکان ہے۔

کشمیر اور گلگت بلتستان میں شدید برفباری اور سردی کی پیشگوئی کی گئی ہے، جبکہ چترال، دیر، اور سوات کے علاقوں میں برفباری کا امکان ہے۔ کوئٹہ اور بارکھان میں بھی بارش اور برفباری ہو سکتی ہے۔

محکمہ موسمیات نے کہا ہے کہ مغربی ہوائی نظام کراچی کو بھی متاثر کرے گا، جس کے نتیجے میں شہر میں 4 جنوری سے سردی بڑھ سکتی ہے، اور درجہ حرارت 10 ڈگری سے نیچے گرنے کا امکان ہے۔

اسکردو میں درجہ حرارت منفی نو، گلگت میں منفی چھ، مری اور کوئٹہ میں صفر، جبکہ اسلام آباد اور پشاور میں ایک ڈگری سینٹی گریڈ ریکارڈ کیا گیا۔