چوہدری پرویز الہیٰ پر نیب ریفرنس میں فرد جرم عائد

لاہور کی احتساب عدالت نے پاکستان تحریک انصاف (پی ٹی آئی) کے صدر اور سابق وزیراعلیٰ پنجاب چوہدری پرویز الہیٰ کے خلاف نیب ریفرنس میں فرد جرم عائد کردی۔

عدالت میں ترقیاتی منصوبوں میں کمیشن وصولی کے الزامات پر دائر نیب ریفرنس کی سماعت ہوئی۔

پیشی کے لیے چوہدری پرویز الہیٰ عدالت پہنچے، تاہم ان کی حاضری عدالتی عملے نے ان کی گاڑی میں جا کر مکمل کی۔

عدالت نے نیب ریفرنس میں ان پر فرد جرم عائد کی، جسے چوہدری پرویز الہیٰ نے تسلیم کرنے سے انکار کردیا۔

احتساب عدالت نے آئندہ سماعت پر گواہوں کو طلب کرتے ہوئے کیس کی کارروائی کو مزید بڑھا دیا۔

دوسری جانب، چوہدری پرویز الہیٰ نے عدالت میں مستقل حاضری معافی کی درخواست دائر کی۔

درخواست میں مؤقف اختیار کیا گیا کہ آئندہ ان کے نمائندے انوار حسین کے ذریعے حاضری مکمل کی جائے۔ عدالت سے درخواست ہے کہ مستقل حاضری معافی کو منظور کیا جائے۔

عدالت نے اس درخواست پر نیب سے جواب طلب کرتے ہوئے سماعت کو 21 جنوری تک ملتوی کردیا۔