پاکستان نے اپنی پہلی خود ساختہ الیکٹرو آپٹیکل (EO-1) سیٹلائٹ خلا میں کامیابی سے بھیج دی۔ چینی میڈیا کے مطابق سیٹلائٹ کو چین کے جی چھوان سیٹلائٹ لانچ سینٹر سے لانگ مارچ ٹو ڈی کیریئر راکٹ کے ذریعے لانچ کیا گیا، جو مدار میں کامیابی سے داخل ہوگیا۔
ای او ون سیٹلائٹ مختلف مقاصد کے لیے تیار کیا گیا ہے، جن میں ماحولیاتی نگرانی، زراعت، اور دفاع شامل ہیں۔ یہ مشن پاکستان کی اسپیس سائنس میں تکنیکی مہارت کو اجاگر کرتا ہے اور خلا میں مقامی طور پر تیار کردہ سیٹلائٹ کا لانچ ایک اہم سنگ میل ہے۔
اسپارکو کے مطابق یہ سیٹلائٹ زراعت، شہری منصوبہ بندی، اور قدرتی آفات کے ردعمل کے لیے اہم ڈیٹا فراہم کرے گا۔ مشن خوراک کی حفاظت، پانی کے انتظام، اور قدرتی وسائل کی نگرانی میں بھی مدد کرے گا۔