کراچی میں سرد ہوائیں اور سردی کی شدت میں اضافہ

شہر قائد میں سرد ہواؤں کے باعث سردی کی شدت میں اضافہ ہوا ہے، اور یہ سلسلہ چند روز تک جاری رہنے کا امکان ہے۔ محکمہ موسمیات کے مطابق کراچی کا کم سے کم درجہ حرارت 10 ڈگری سینٹی گریڈ ریکارڈ کیا گیا جبکہ سردی کی شدت 8 ڈگری محسوس کی گئی۔ شمال مشرقی ہواؤں کی رفتار 25 سے 35 کلومیٹر فی گھنٹہ تک رہی، اور زیادہ سے زیادہ درجہ حرارت 25 ڈگری سینٹی گریڈ تک جانے کا امکان ہے۔

صبح کے وقت شہر کے چند علاقوں میں ہلکی بارش بھی ہوئی، جو سرد موسم کو مزید خوشگوار بنا رہی ہے۔

ملک کے دیگر علاقوں میں بھی شدید سردی کی لہر برقرار ہے۔ گلگت بلتستان اور بلوچستان میں سردی کی شدت زیادہ ہے، اسکردو میں درجہ حرارت منفی 9، زیارت منفی 7، استور منفی 6، جبکہ کوئٹہ اور گلگت میں منفی 5 ڈگری سینٹی گریڈ ریکارڈ کیا گیا۔

مری اور گلیات میں برفباری نے حسین مناظر کو مزید خوبصورت بنا دیا ہے، جبکہ لاہور سمیت پنجاب کے میدانی علاقوں میں دھند کی شدت برقرار ہے، جس کے باعث موٹروے کے کئی حصوں کو بند کردیا گیا ہے۔

محکمہ موسمیات نے پیشگوئی کی ہے کہ آئندہ 24 گھنٹوں کے دوران ملک کے بیشتر علاقوں میں موسم سرد اور خشک رہے گا۔ تاہم کشمیر، گلگت بلتستان، دیر، اور سوات سمیت پہاڑی علاقوں میں شدید سردی کا امکان ہے۔