راولپنڈی: چیمپئنز ٹرافی کے اہم مقابلے میں نیوزی لینڈ نے بنگلادیش کو 5 وکٹوں سے شکست دے کر سیمی فائنل میں جگہ بنا لی، جب کہ پاکستان کی ایونٹ میں رہنے کی امیدیں ختم ہوگئیں۔
راولپنڈی کرکٹ اسٹیڈیم میں کھیلے گئے میچ میں بنگلادیش نے پہلے بیٹنگ کرتے ہوئے نیوزی لینڈ کو 237 رنز کا ہدف دیا، جسے کیوی ٹیم نے 5 وکٹوں کے نقصان پر حاصل کرلیا۔ اس کامیابی کے بعد نیوزی لینڈ سیمی فائنل میں پہنچ گیا، جب کہ دفاعی چیمپئن پاکستان چیمپئنز ٹرافی کی دوڑ سے باہر ہوگیا۔
واضح رہے کہ پاکستان کو اپنے گروپ میچز میں بھارت اور نیوزی لینڈ کے خلاف شکست کا سامنا کرنا پڑا تھا، جس کے بعد قومی ٹیم کے سیمی فائنل میں پہنچنے کے امکانات اگر مگر کا شکار ہوگئے تھے۔ پاکستان کی سیمی فائنل میں رسائی کے لیے لازم تھا کہ بنگلادیش نیوزی لینڈ کو بڑے مارجن سے ہرائے، اور بھارت بھی کیویز کو بھاری مارجن سے شکست دے۔ اس کے علاوہ قومی ٹیم کو اپنا آخری میچ بھی بڑے فرق سے جیتنا ضروری تھا، تاہم ان شرائط پر پورا نہ اترنے کے باعث پاکستان اور بنگلادیش دونوں سیمی فائنل کی دوڑ سے باہر ہوگئے، جبکہ بھارت اور نیوزی لینڈ نے اگلے مرحلے کے لیے کوالیفائی کرلیا۔