لاہور: وزیراعلیٰ پنجاب مریم نواز شریف نے خواتین کی ترقی کے لیے ایک اہم قدم اٹھاتے ہوئے پنجاب وائلڈ لائف فورس میں پہلی بار خواتین کو شامل کر لیا ہے۔ اس اقدام کے تحت، فورس میں 22 فیصد سے زائد خواتین کو منتخب کیا گیا، جو کہ جنگلات اور جنگلی حیات کے تحفظ کے لیے ایک نیا سنگ میل ہے۔
وزیراعلیٰ کی ہدایت پر پنجاب کی پہلی وائلڈ لائف فورس کی تشکیل کا عمل جاری ہے۔ وائلڈ لائف سپروائزر کی آسامیوں پر کامیاب ہونے والی خواتین کی شرح 47.2 فیصد جبکہ مرد امیدواروں کی شرح 48.6 فیصد رہی۔ اسی طرح وائلڈ لائف انسپکٹرز کے عہدوں پر 35 مرد اور 34 خواتین کی تقرری عمل میں آئی۔
مریم نواز شریف نے کامیاب ہونے والی خواتین کو مبارکباد دی، جبکہ سینئر صوبائی وزیر مریم اورنگزیب نے اس فیصلے کو میرٹ اور خواتین کی ترقی کے ویژن کی جیت قرار دیا۔ ان کا کہنا تھا کہ یہ پہلا موقع ہے جب کسی خاتون وزیراعلیٰ نے خواتین کی ترقی کے لیے اتنا بڑا فیصلہ کیا ہے۔
مریم اورنگزیب نے مزید کہا کہ ہر لڑکی کو یہ یقین ہونا چاہیے کہ وہ کسی بھی شعبے میں اپنی قابلیت کی بنیاد پر کامیابی حاصل کر سکتی ہے۔ وائلڈ لائف فورس کا قیام نہ صرف جنگلات اور جنگلی حیات کے تحفظ میں ایک انقلابی قدم ہے بلکہ خواتین کو مزید مواقع دینے کی طرف بھی ایک مضبوط پیشرفت ہے۔