چیمپئنز ٹرافی: افغانستان کی شاندار فتح، انگلینڈ سیمی فائنل کی دوڑ سے باہر

لاہور: افغانستان نے چیمپئنز ٹرافی میں گروپ بی کے اہم مقابلے میں انگلینڈ کو سنسنی خیز مقابلے کے بعد 8 رنز سے شکست دے کر سیمی فائنل کی دوڑ سے باہر کر دیا۔

قذافی اسٹیڈیم، لاہور میں کھیلے گئے اس معرکے میں انگلش ٹیم 326 رنز کے ہدف کے تعاقب میں 317 رنز پر ڈھیر ہوگئی۔ انگلینڈ کے جو روٹ نے 120 رنز کی شاندار اننگز کھیلی، لیکن دیگر کھلاڑی بڑی شراکت قائم کرنے میں ناکام رہے۔

دیگر نمایاں بلے بازوں میں جوس بٹلر اور بین ڈکٹ نے 38، 38 رنز بنائے، جبکہ جیمی اوورٹن 32، ہیری بروک 25 اور جوفرا آرچر 14 رنز بنا کر آؤٹ ہوئے۔ فل سالٹ 12، لیام لیونگسٹن 10، جیمی اسمتھ 9 اور عادل رشید 5 رنز بنا سکے۔

افغان باؤلرز نے شاندار کارکردگی کا مظاہرہ کیا، عظمت اللہ عمرزئی نے 5 وکٹیں حاصل کر کے انگلینڈ کی بیٹنگ لائن کو تہس نہس کر دیا۔ محمد نبی نے 2 جبکہ فضل الحق فاروقی اور گلبدین نائب نے 1، 1 وکٹ حاصل کی۔

اس سے قبل افغانستان نے ٹاس جیت کر پہلے بیٹنگ کرتے ہوئے 50 اوورز میں 7 وکٹوں کے نقصان پر 325 رنز بنائے۔ ابراہیم زادران 177 رنز کی شاندار اننگز کھیل کر نمایاں رہے، جبکہ عظمت اللہ عمرزئی 41، حشمت اللہ شاہدی اور محمد نبی نے 40، 40 رنز بنائے۔

دیگر کھلاڑیوں میں رحمان اللہ گربز 6، صدیق اٹل 4 اور رحمت شاہ 4 رنز بنا کر آؤٹ ہوئے، جبکہ راشد خان اور گلبدین نائب 1، 1 رن کے ساتھ ناٹ آؤٹ رہے۔

انگلینڈ کی جانب سے جوفرا آرچر نے 3، لیام لیونگسٹن نے 2، جبکہ عادل رشید اور جیمی اوورٹن نے ایک، ایک وکٹ حاصل کی۔

یہ جیت افغانستان کے سیمی فائنل میں پہنچنے کے امکانات کو مزید مضبوط کرتی ہے جبکہ انگلینڈ کی ٹیم ایونٹ سے باہر ہوگئی۔