ماہرہ خان نے زندگی کے اہم راز سے پردہ اٹھا دیا

پاکستان کی نامور اداکارہ ماہرہ خان نے ایک حالیہ پوڈکاسٹ میں اپنی عمر، ذہنی صحت کے مسائل، اور زندگی کے اہم تجربات پر تفصیل سے بات کی۔ ماہرہ خان نے انکشاف کیا کہ وہ جلد 40 برس کی ہونے والی ہیں اور ماضی میں اپنی صحت کو نظرانداز کرنے پر افسوس کا اظہار کیا۔

انہوں نے بتایا کہ ایک وقت ایسا بھی آیا جب وہ ڈپریشن اور دیگر ذہنی مسائل کا شکار رہیں۔ ماہرہ خان کا کہنا تھا کہ جسمانی یا ذہنی بیماری میں مبتلا ہونے پر شرمندگی محسوس کرنے کی ضرورت نہیں ہے، بلکہ اس کا علاج ممکن ہے اور ماہرین سے مدد لینا بہت ضروری ہے۔

اداکارہ نے مزید کہا کہ مشکل ترین وقت میں ادویات نے انہیں سہارا دیا، جس کے بعد روحانی سکون، قریبی دوستوں، اہل خانہ، اور ان کے بیٹے اذلان نے ان کا حوصلہ بڑھایا۔

انہوں نے خواتین کو مشورہ دیا کہ وہ اپنی جسمانی اور ذہنی صحت کا خاص خیال رکھیں۔ ماہرہ خان کا کہنا تھا کہ اگر وہ 30 سال کی عمر میں اپنی صحت پر توجہ دیتیں تو آج شاید بہتر حالت میں ہوتیں۔