تابش ہاشمی: فواد خان کو شو میں مدعو نہ کرنے کی وجہ کیا ہے؟

پاکستان کے مشہور میزبان تابش ہاشمی، جنہیں اپنی کامیڈی اور دلچسپ انٹرویوز کی وجہ سے بے حد مقبولیت حاصل ہے، نے تقریباً ہر بڑے اسٹار کا اپنے شو میں انٹرویو کیا ہے۔ ان کی شو کی منفرد پیشکش اور مہمانوں کے ساتھ خوشگوار بات چیت سامعین کے چہروں پر مسکراہٹ بکھیرتی ہے۔

تاہم، حالیہ انٹرویو میں تابش ہاشمی سے پوچھا گیا کہ فواد خان، جو پاکستان کے بڑے اسٹارز میں شمار ہوتے ہیں، اب تک ان کے شو میں کیوں نہیں آئے؟ کیا بجٹ اس کی وجہ ہے؟

تابش نے واضح کیا کہ بجٹ کوئی مسئلہ نہیں ہے۔ اصل بات یہ ہے کہ وہ سمجھتے ہیں کہ فواد خان ان کے شو کے فارمیٹ کے لیے زیادہ سنجیدہ شخصیت ہیں۔ انہوں نے کہا، "ہم صرف شو کے اینڈ پروڈکٹ کے بارے میں سوچتے ہیں۔ ہمارا مقصد ایک ایسا شو پیش کرنا ہے جو ناظرین کے لیے دلچسپ اور مزاح سے بھرپور ہو۔”

تابش نے مزید بتایا کہ ان کے شو میں مہمانوں کی فہرست اجتماعی طور پر ٹیم کے مشورے سے تیار کی جاتی ہے اور اس بات کو مدنظر رکھا جاتا ہے کہ شو کی دلچسپی برقرار رہے، نہ کہ مہمان کی شہرت یا سٹارڈم۔

تابش کا یہ انٹرویو واضح کرتا ہے کہ ان کے شو کی توجہ مواد اور سامعین کی تفریح پر ہے، نہ کہ بڑے ستاروں کو مدعو کرنے پر۔