اسلام آباد: چیئرمین ایف بی آر نے بیرون ملک سے ایک سے زائد موبائل فون لانے پر پابندی کی تجویز پر عمل درآمد روک دیا ہے۔
پیر کو ایف بی آر کی جانب سے بیگیج اسکیم میں ترمیم کے تحت بیرون ملک سے کمرشل مقدار میں اشیاء لانے پر پابندی لگانے اور ذاتی استعمال کے لیے صرف ایک موبائل فون لانے کی اجازت دینے کا نوٹیفکیشن جاری کیا گیا تھا۔ تاہم چیئرمین ایف بی آر نے کسٹم کے بیگیج رولز 2006 میں مجوزہ ترامیم واپس لے کر فوری طور پر ایک سے زائد موبائل فون لانے پر پابندی کی تجویز پر عمل درآمد روکنے کی ہدایت کی۔
رپورٹ کے مطابق، موجودہ قانون کے مطابق بیرون ملک سے آنے والے مسافروں کو دو موبائل فون لانے کی اجازت برقرار رکھی گئی ہے۔
اس کے علاوہ، چیئرمین ایف بی آر نے 1200 ڈالر سے زائد کی کمرشل اشیاء پر پابندی کی تجویز بھی واپس لے لی ہے اور رولز میں مجوزہ ترامیم پر مشاورت کرنے کے بعد دوبارہ پیش کرنے کی ہدایت کی ہے۔