پاکستان کرکٹ ٹیم کے طویل قامت فاسٹ باؤلر محمد عرفان نے بین الاقوامی کرکٹ سے کنارہ کشی اختیار کرنے کا اعلان کردیا۔ اس سے قبل محمد عامر اور عماد وسیم بھی ریٹائرمنٹ کا اعلان کر چکے ہیں۔
محمد عرفان نے اپنی ریٹائرمنٹ کا اعلان سماجی رابطے کی ویب سائٹ ’ایکس‘ پر ایک جذباتی پیغام کے ذریعے کیا۔ اپنے پیغام میں انہوں نے کہا:
"بین الاقوامی کرکٹ سے ریٹائرمنٹ کا فیصلہ کرلیا ہے۔ اپنے ساتھی کھلاڑیوں، کوچز، اور مداحوں کا شکریہ ادا کرتا ہوں جنہوں نے میرے کریئر کو یادگار بنایا۔ پاکستان کے لیے کھیلنا ہمیشہ باعث فخر رہا۔ پاکستان زندہ باد۔”
محمد عرفان نے قومی ٹیم کے لیے آخری مرتبہ 2019 میں آسٹریلیا کے خلاف ٹی20 میچ کھیلا تھا۔ انہوں نے اپنے کریئر میں 4 ٹیسٹ، 60 ون ڈے، اور 22 ٹی20 میچز میں پاکستان کی نمائندگی کی۔
یاد رہے کہ عماد وسیم اور محمد عامر نے بھی اپنے کرکٹ کیریئر کا اختتام کرتے ہوئے ریٹائرمنٹ کا اعلان کیا تھا۔
محمد عامر نے اپنے الوادعی پیغام میں کہا تھا:
"پاکستان کے لیے کھیلنا میرے لیے اعزاز کی بات ہے۔ یہ ایک مشکل فیصلہ تھا، لیکن یہ وقت ہے کہ نئی نسل کے لیے جگہ بنائی جائے تاکہ وہ پاکستان کرکٹ کو نئی بلندیوں تک پہنچا سکیں۔”
پاکستان کرکٹ بورڈ نے ان کھلاڑیوں کے لیے نیک تمناؤں کا اظہار کرتے ہوئے ان کی خدمات کو سراہا۔