پاکستان کی علاقائی ممالک کو برآمدات میں رواں مالی سال کے ابتدائی 4 ماہ کے دوران سالانہ بنیادوں پر 4.09 فیصد اضافہ ریکارڈ کیا گیا ہے۔
ادارہ شماریات پاکستان کے مطابق، مالی سال کے پہلے 4 ماہ میں چین، بنگلہ دیش، سری لنکا، نیپال، مالدیپ، اور بھارت کو برآمدات کا مجموعی حجم 1.506 ارب ڈالر رہا، جو ملک کی مجموعی برآمدات کا 14.33 فیصد ہے۔
مجموعی ملکی برآمدات اس مدت میں 10.50 ارب ڈالر تک پہنچ گئیں۔ علاقائی برآمدات میں چین سب سے بڑا خریدار رہا، جہاں برآمدات 813.44 ملین ڈالر ریکارڈ کی گئیں، تاہم یہ گزشتہ سال کی اسی مدت کے 952.38 ملین ڈالر کے مقابلے میں 14.58 فیصد کم رہیں۔
افغانستان کو برآمدات میں 291.77 ملین ڈالر کا اضافہ ہوا، جو پچھلے مالی سال کے 182.61 ملین ڈالر سے زیادہ ہے۔
بنگلہ دیش کو پاکستانی برآمدات میں 28.60 فیصد کا نمایاں اضافہ دیکھنے میں آیا، اور اس کا حجم 247.31 ملین ڈالر تک پہنچ گیا جو گزشتہ مالی سال کی اسی مدت میں 192.31 ملین ڈالر تھا۔
سری لنکا کو برآمدات 148.93 ملین ڈالر تک پہنچیں، نیپال کو 1.38 ملین ڈالر، اور مالدیپ کو 1.74 ملین ڈالر کی مصنوعات برآمد کی گئیں۔